Catro maneiras de cociñar o polo

A carne de polo é unha das máis populares do mercado, tanto polo seu alto contido de nutrientes e proteínas como pola súa versatilidade na cociña. Cando pensamos nas posibles receitas con polo, imaxinamos infinitas opcións como estufados, fritidos, á prancha, gornicións etcétera. Por iso en Bon Pollo mostrámosche distintas opcións de cocción para poderes gozar ao máximo desta nutritiva carne.

Escalfado

Para obter unha carne deliciosa e tenra proba a escalfalo. Trátase de quentar auga nunha ola coa cantidade suficiente para cubrir o polo. A clave está en engadir verduras como cebola, cenoria pelada ou apio. Ao escalfar todos os ingredientes acompañados dalgúns grans de pementa, o polo acaba adquirindo o sabor do caldo.

Javier Fontova, profesor de hostalería, suxire engadirlle especias como o loureiro, o romeu ou un chorro de viño branco para aumentar o interese gustativo deste prato. Finalmente, pomos a auga en ebulición, colocamos as pezas de polo e deixámolo a cocer durante 20 minutos.

Ao grill

A cocción ao grill «é unha elaboración apropiada para as dietas», asegura Fontova. Ademais explica que para este tipo de cocción (a lume forte, como na barbacoa) é preferible empregar pezas finas, coma as peitugas de polo. Debemos colocar as pezas nunha prata, situar o indicador do forno na posición de grill e xa está!

Unha gornición sa para este tipo de cocción pode ser a base de verduras á prancha ou cun acompañamento de allos e cebolas tenras. Se se opta por unha mariñada (coma a famosa salsa barbacoa), é importante ter en conta que se queima facilmente, e por iso hai que untar as pezas coa salsa nos últimos minutos de cocción.

Ao vapor

Coa técnica de cocción ao vapor, a carne perde a graxa, pero mantén todas as súas propiedades nutritivas. Para empregar esta técnica temos que colocar o polo sobre unha grella de bambú ou metal enriba da auga a ferver. Para que a peza coza no seu propio zume grazas ao efecto do mesmo vapor, situaremos o polo no centro dun anaco de papel de aluminio e a seguir dobraremos os extremos para dentro para que o zume non escape. Finalmente introduciremos o polo envolto no forno e agardaremos ata que a carne se torne rosada (uns 20 minutos).

Fontova propón acompañar o polo ao vapor cun variado de verduras como a cabaciña, os champiñóns ou os feixóns verdes.

Asar

Aínda que o asado caseiro se fai ao forno, os cociñeiros profesionais empregan un artefacto deseñado para este tipo de cocción. «A posición e a temperatura do forno deben ser as mesmas que co gratinador. O truco está en que a pel quede churrascada, pero sen queimarse», indica Fontova. Para comprobar o punto de cocción hai que furar a carne, e se non sae sangue, significa que está lista. As pezas máis indicadas son os zancos (aprox. 45 minutos) e as alas (media hora), porque son as partes máis zumarentas. Un bo acompañamento para este tipo de cocción é o salteado de cogomelos.

Xa está listo!

Aconsellamos o uso dun termómetro especial para a carne co fin de comprobar se está no seu punto. Introdúceo uns 6 cm na parte máis carnosa do polo e comproba que a temperatura interna sexa de 75 °C polo menos.

Para os amantes da sabedoría popular, a técnica tradicional consiste en introducir un espeto e comprobar que, en primeiro lugar, a variña se humedece lixeiramente (de non ser así, significa que a peza está seca) e, en segundo lugar, que o líquido que sae é de cor clara e sen restos de sangue. Se estamos a cociñar cuartos, hai que separar un pouco a perna e o zanco do corpo para comprobar que a cor e a textura son os axeitados.