Beneficio | Activa o teu metabolismo
É importante coñecermos as funcións do noso metabolismo e como nos axuda. Cando falamos do metabolismo estamos a referirnos a como o noso organismo produce e administra a cantidade de enerxía que necesitamos para funcionar.
Baséase, por tanto, no conxunto de reaccións químicas que se producen nas células co obxectivo de converter os alimentos en enerxía. O noso organismo funciona grazas á enerxía que producen estas células e tecidos nun constante equilibrio entre a xeración de enerxía e a súa administración.
Como activamos o metabolismo?
Facer exercicio
Hai estudos que afirman que desenvolver a musculatura é un dos factores máis importantes para aumentarmos o metabolismo.
Os músculos queiman aproximadamente tres veces máis calorías que graxa. Se temos en conta que, de media, os músculos corresponden ao 40 por cento do peso dun home adulto e ao 30 por cento no caso das mulleres, desenvolvermos a masa muscular mediante o exercicio físico pode contribuír á queima de calorías e, por tanto, ao aumento do noso metabolismo.
Hai dous tipos de exercicio. O aeróbico pode ter intensidade baixa, media ou alta, e principalmente aumenta a resistencia cardiovascular. Ese é o caso, por exemplo, de correr, bailar, ir en bici ou facer natación.
Por outra parte, o exercicio anaeróbico é aquel que realizamos para adquirir potencia e aumentar a masa muscular, como levantar pesas, facer abdominais ou correr distancias curtas a gran velocidade.
Coidar a alimentación
Cando se nos acelera o metabolismo non almacenamos graxa e o corpo pídenos que inxiramos alimentos. Cales son os máis indicados para este momento?
- A carne de polo. Achéganos unha gran cantidade de proteínas. Concretamente, a vitamina B6 intervén na produción de enerxía dos nutrientes. Ademais, favorece a queima de calorías e acelera o metabolismo.
- O peixe azul. É rico en omega 3 e axuda a activar o metabolismo. Recomendámosche as sardiñas, as cabalas ou o salmón que, ademais, van saciar a sensación de apetito que se produce ao facermos deporte.
- Os cítricos ricos en vitamina C. A laranxa, a mandarina ou o pomelo vanche axudar a eliminar toxinas e impurezas do corpo.
- As especias picantes. O chile e a pementa vermella contribúen favorablemente na aceleración do metabolismo. Se che gusta sazonar os pratos, estás de sorte!
Desde Bon Pollo recomendámosche activar o metabolismo manténdote en forma, consumindo alimentos de calidade e coidándote física e mentalmente.