Albóndegas de polo en salsa de verduras

Ingredientes para 2 persoas

400 g de escalope de polo Bon Pollo
1 cebola
1 dente de allo
1 cenoria
1 ovo
40 g de salsa de tomate
100 g de pan relado
60 ml de leite
60 ml de viño branco
300 ml de caldo de polo
Perexil fresco
Follas de loureiro
Aceite de oliva
Sal
Pementa negra

Hoxe imos preparar unha receita clásica, sinxela e de toda a vida: albóndegas de polo en salsa de verduras, coma as da avoa. Non hai nada como a comida caseira e preparada con cariño!

Cociñar na casa permítenos controlar os ingredientes, escoller alimentos máis saudables e personalizar os pratos segundo as nosas necesidades e gustos. Ademais, se o facemos en compañía dos nosos seres queridos, convértese unha forma marabillosa de compartir tempo de calidade e desfrutar tanto da preparación como do resultado final.

Anímaste a probar estas ricas albóndegas de polo? Deixámosche aquí a receita completa, e no noso perfil de Instagram atoparás a versión en vídeo!

Elaboración

  1. Picar a cebola, o allo e a cenoria en dados pequenos (brunoise).
  2. Cortar e picar os escalopes de polo.
  3. Mesturar nun cunco a carne de polo picada, o ovo batido, o leite, o pan relado, unhas follas de perexil picadas e un chisco de sal e pementa.
  4. Elaborar as albóndegas: coller un pouco da masa anterior e bolear.
  5. Quentar un chisco de aceite nunha tixola e marcar as albóndegas de polo a lume medio. Retirar.
  6. Na mesma tixola, rustrir a cebola, o allo, a cenoria e unhas follas de loureiro a lume medio. Salpementar.
  7. Desglasar co viño branco e engadir a salsa de tomate. Cociñar durante 2-3 minutos.
  8. Engadir as albóndegas de polo e o caldo. Mesturar e cocer durante 20-25 minutos a lume medio.
  9. Para empratar, servir as albóndegas de polo en salsa de verduras nun prato e botarlle un chisco de perexil picado por riba. E non esquezas as rebandas de pan para acompañar este delicioso prato!