Blanquetas con salsa de chocolate e laranxa

Hai receitas que teñen a capacidade de reconfortar a alma nos días máis fríos. É o caso da nosa elaboración de hoxe: blanquetas (ou blanquettes) de polo con salsa de chocolate e laranxa.

Ademais, esta receita é idónea para experimentarmos co poder das especias, por exemplo co cravo e a canela, que nos poden vir moi ben para aromatizar a salsa de chocolate. O inverno tórnase máis levadío cun prato coma este. Prometido!

Elaboración

1. Pelar e picar os allos porros e as cenorias en dados pequenos (brunoise). Reservar.
2. Pelar e retirar a parte branca interior da pel da laranxa. Reservar.
3. Dourar as blanquetas de polo nunha tixola cun chisco de aceite a lume medio. Salpementar por ambos os laterais. Reservar.
4. Quentar un chisco de aceite de oliva nunha tixola e rustrir os allos porros a lume medio ata que comecen a tornarse transparentes.
5. Engadir as cenorias e refogar un par de minutos.
6. Desglasar co viño tinto engadindo a pel da laranxa, os cravos, a rama de canela e as follas de loureiro. Salpementar e deixar reducir durante uns minutos a lume medio.
7. Engadir o caldo de carne coas blanquetas de polo e deixar reducir todo xunto durante 20 minutos a lume medio. Rectificar a cantidade de sal e pementa ao gusto.
8. Incorporar o chocolate negro fóra do lume. Remexer ata que o chocolate quede fundido. Se a salsa está moi espesa, engadirlle un pouco de caldo.
9. Para servir, pór un chisco de salsa de chocolate, o rustrido e as blanquetas de polo na base do prato. Decorar con ceboliño picado.

Gustouche esta receita? Seguro que che encantará esta peituga de polo chea de salsa de laranxa.