Blinis especiados de polo

A quen non lle gustan os canapés? Propómosche unha receita ideal para as celebracións gourmet: blinis especiados de polo.

É o prato perfecto para levarmos a unha cea de picar cos amigos, desas que invitan a parolar con todos os presentes. 

Un consello: para conseguir unha textura esponxosa, pica moi finiños todos os ingredientes que formarán parte do recheo dos blinis. E a gozar!

Elaboración

1. Machucar os allos. Reservar. 
2. Pelar e picar a cebola, a mazá e a cenoria en dados pequenos (brunoise). Reservar. 
3. Picar os cogombriños en dados pequenos (brunoise). Reservar. 
4. Picar ben miúdas as alcaparras e as olivas. Reservar.
5. Relar a pel do limón. Reservar. 
6. Fundir a manteiga nunha tixola a lume medio e incorporar os allos cunhas ramas de tomiño. Mesturar.
7. Engadir os escalopes de polo e cociñalos a lume medio. Salpementar, picar en anaquiños moi pequenos e reservar.
8. Mesturar nun cunco o polo resultante coa cebola, a mazá, a cenoria, os cogombriños, as alcaparras, as olivas, a mostaza, a maionesa, un chisco de reladura de limón, o sal e a pementa. Remexer ben e reservar na neveira durante 1 hora.
9. Botar nun cunco o ovo, o iogur, a fariña, o lévedo, un chisco de sal, a pementa, as herbas provenzais, a cúrcuma e o curry. Mesturar ben ata obter unha masa homoxénea. Reservar. 
10. Engadir un pouco de aceite nunha tixola e espallalo cun papel de cociña.
11. Incorporar a masa anterior facendo pequenos círculos e cociñar durante un minuto a lume medio. Darlle a volta e deixar que se fagan durante un minuto máis. Reservar. 
12. Engadir en cada blini unha cullerada do recheo do polo.
13. Para empratar, servir os blinis especiados de polo nunha bandexa e botarlle por riba un chisco de ceboliño picado. 

Se quedaches con gana de máis, tamén podes preparar estes roliños de polo con verduras e xamón.