Canelóns reenchidos de polo, grelos e lacón

Ingredientes para 4 persoas

8 filetes de peituga de polo Bon Pollo
16 unidades de pasta para canelóns
200 g de lacón desalgado
1 cebola
2 dentes de allo
400 g de grelos
60 g de fariña
60 g de manteiga
1 l de leite
120 ml de caldo de polo
80 ml de viño branco
Queixo relado
Noz moscada
Aceite de oliva
Sal
Pementa negra

En Cataluña e nas Baleares a tradición manda celebrar o 26 de decembro, día de santo Estevo, cun bo prato de canelóns. Sabes de onde vén este costume?

Existen varias hipóteses, aínda que unha das máis estendidas é que se trata de aproveitar as sobras do xantar de Nadal, en concreto as da sopa escudella e a carne de ave (como o pavo, a pularda ou o capón).

Ora ben, por que envolver estes restos nunha prancha de pasta? A receita procede de Francia, do luxoso restaurante Maison Dorée de París, que abriu un segundo local na praza de Cataluña de Barcelona a finais do século XIX. A clase alta catalá non tardou en namorarse dos deliciosos canelóns e incorporounos ao seu menú nos días festivos.

Nós propomos un xiro moderno para esta receita tan querida: canelóns reenchidos de polo, grelos e lacón, unha mestura de sabores que, sen dúbida, tamén vai estar á altura dos mellores restaurantes e dos comensais máis esixentes.

Elaboración

  1. Picar os filetes de polo e o lacón en dados pequenos. Reservar.
  2. Pelar e picar a cebola e os dentes de allo (sen o xerme) en dados pequenos (brunoise). Reservar.
  3. Partir os grelos en anacos pequenos. Reservar.
  4. Fundir a manteiga nun cazo a lume medio e engadirlle a fariña. Remexer ata obter un roux e cocer durante uns minutos ata que a fariña quede torrada.
  5. Incorporar o leite (morno) e remexer con batedor a lume lento ata obter unha textura máis densa. Salpementar e botarlle un chisco de noz moscada. Reservar.
  6. Quentar un chisco de aceite nunha tixola e rustrir a cebola cos allos a lume medio. Salpementar.
  7. Desglasar co viño branco e subir o lume para evaporar o alcohol.
  8. Incorporar o polo e o lacón. Mesturar e cociñar durante 5-7 minutos a lume medio.
  9. Engadir os grelos e un chisco de sal. Deixar que se faga durante un par de minutos máis.
  10. Triturar cun procesador de alimentos a elaboración anterior co caldo e unhas culleradas de bechamel ata obter unha masa cremosa.
  11. Ferver auga con sal nunha ola e cocer as pranchas dos canelóns durante 5-7 minutos a lume medio. Deixar a arrefriar, secar e reservar.
  12. Prequentar o forno a 250 °C.
  13. Estirar as láminas de canelón nunha táboa e botar en cada unha delas un chisco do recheo de polo, grelos e lacón. Enrolar.
  14. Nunha bandexa de forno, engadir unha camada de bechamel e pousarlle enriba os canelóns reenchidos. Cubrir con máis bechamel e agregar un pouco de queixo.
  15. Gratinar a 250 °C ata que estean lixeiramente dourados.
  16. Para empratar, servir os canelóns reenchidos de polo, grelos e lacón nun prato.