Cocido galego

Ingredientes para 4 persoas

1 bandexa de zanquiños de Bon Pollo
500 g de lacón
1 orella de porco
8 costelas de porco salgadas
500 g de xarrete de tenreira galega
300 g de grelos escaldados
4 patacas galegas
2 chourizos
300 g garavanzos secos
Auga mineral
Sal

Febreiro é un dos nosos meses favoritos do ano. Será porque é época de Entroido e de cocido? 

Non é segredo ningún que para un caldo ser excelente, debe incluír todos os sabores da nosa terra e unha boa dose de mimo e paciencia. 

Asegurámosche que o resultado paga a pena: non hai nada como un reconfortante e delicioso cocido para afrontar con ledicia a recta final do inverno. 

A nosa receita de hoxe é un agasallo para todos os amantes do cocido de Entroido!

Elaboración

  1. Hidratar os garavanzos secos nun cunco con 1 litro de auga mineral durante 12 horas. Escoar, lavar ben e reservar. 
  2. Desalgar a orella e as costelas de porco nun recipiente con auga mineral durante 12 horas. Hai que mudar a auga 2 ou 3 veces. Reservar. 
  3. Pelar as patacas. Reservar. 
  4. Ferver a auga nunha ola a lume medio e engadir as carnes: a orella e as costelas de porco, o xarrete de tenreira, o lacón e os zanquiños de polo. Incorporar os garavanzos (nunha bolsa de tea especial para a cocción) nunha ola. Cocer todo xunto durante 1 hora e 30 minutos a lume medio-baixo tapado. Salgar a media cocción e reservar. 
  5. Quentar auga nunha ola e cocer os grelos coas patacas e os chourizos durante 25-30 minutos. Salgar e reservar. 
  6. Para empratar, colocar nunha prata as carnes (orella e costelas de porco, o xarrete de tenreira, o lacón e os zanquiños de polo) e mais os garavanzos, e á parte, nun cunco, os grelos coas patacas e os chourizos, mantendo un chisco de caldo da cocción.

Se che gustan as receitas tradicionais de inverno, encantarache esta sopa de polo con grelos e fabas brancas. Galicia en estado puro!