Coxa de polo con salsa balsámica

Ingredientes para 4 persoas

2 bandexas de coxa con óso e con pel de Bon Pollo
200 ml de crema balsámica de Módena
500 ml de caldo de polo
40 g de mel de flores
50 g de fariña triga
150 g de cogomelos variados
1 cebola branca
2 dentes de allo
6 follas de alfabaca fresca
20 g de piñóns
Ceboliño
Aceite de oliva
Sal
Pementa negra

Se nos preguntan, sempre dicimos que non hai nada como unhas saborosas coxas de polo para elaborar un bo guiso. A nosa receita de hoxe, coxa con salsa balsámica, quedounos tan gorentosa que estamos desexando compartila contigo.

Preparaches algunha vez unha salsa con crema balsámica de Módena e mel de flores? O resultado é intenso, mais tamén doce, dunha melosidade inigualable. Engádelle uns cogomelos variados, unha manchea de piñóns e un chisco de alfabaca fresca e acabará sendo o teu prato favorito.

Elaboración

  1. Pelar e picar a cebola e os dentes de allo (sen o xerme) en dados pequenos (brunoise). Reservar. 
  2. Partir os cogomelos en cuartos. Reservar. 
  3. Quentar un pouco de aceite de oliva nunha tixola e dourar lixeiramente as coxas de polo a lume alto. Salpementar por ambos os laterais e baixar o lume para cocelos. Reservar en quente.
  4. Na mesma tixola, dourar lixeiramente a cebola cos dentes de allo. Salpementar. 
  5. Engadir a fariña e cociñala un par de minutos a lume medio sen deixar de remexer. 
  6. Incorporar o caldo de polo e a crema balsámica de Módena. Mesturar cun batedor e deixar a reducir uns minutos.  
  7. Engadirlle o mel coas follas de alfabaca fresca. Mesturar e cocer todo xunto a lume baixo durante 5 minutos. Se a salsa queda moi espesa, engadirlle un pouco máis de caldo. Reservar. 
  8. Nunha tixola cun chisco de aceite de oliva, saltear os cogomelos a lume medio. Salpementar e reservar.  
  9. Nunha tixola, torrar (sen aceite) os piñóns a lume alto. Reservar. 
  10. Botar un chisco de salsa balsámica na base do prato pousarlle enriba as coxas de polo. Decorar cos cogomelos salteados e os piñóns torrados. Botarlle por riba un pouco de ceboliño picado.