Cordon bleu de polo con queixo tetilla

Probaches algunha vez un delicioso cordon bleu?

Segundo a lenda, o nome inspirouse na Orde do Espírito Santo, que se fundou no século XVI en Francia e cuxos membros vestían unha banda azul (en francés, cordón bleu) como sinal do seu prestixio e nobreza.

Os cociñeiros, que sorprendían os monarcas co seu nivel e habilidades culinarias, tamén adoitaban atar os mandís cunha cinta azul que evocaba aquela distinción. E un daqueles chefs, cuxa identidade descoñecemos, foi quen inventou este prato tan orixinal, composto por un filete de polo recheo de xamón e queixo, enrolado, empanado e fritido.

Ademais, vai acompañado cun mollo de nata e mostaza que o torna máis saboroso e lle dá un elemento de contraste. Este cordon bleu de polo con queixo de tetilla vaite sorprender polo seu incrible sabor e contraste de texturas!

Elaboración

1. Pelar e cortar a cebola en dados moi pequenos (brunoise). Reservar.
2. Cortar o queixo de tetilla en rodas. Reservar.
3. Filetear cada peituga de polo en dúas partes e abrir cada filete resultante pola metade, pero sen chegar ao final. Espalmar e salpementar.
4. Incorporar en cada filete de polo dúas camadas de liscos de xamón e queixo de tetilla. Enrolar.
5. Envolver un roliño de polo con papel filme apertando ben. Repetir o proceso cos outros e refrixerar durante 30 minutos na neveira.
6. Desfacer a manteiga nunha tixola e rustrir a cebola a lume medio. Salpementar.
7. Incorporar 10 g de fariña e cocer durante un par de minutos sen deixar de remexer.
8. Engadir a nata e a mostaza. Mesturar e cociñar durante 5 minutos a lume baixo.
9. Triturar cun procesador de alimentos ata obter unha salsa homoxénea. Reservar.
10. Empanar os roliños de polo con fariña, ovo batido e pan relado.
11. Fritir os roliños de polo nunha tixola con aceite a lume medio.
12. Para empratar, cortar o cordon bleu en toros e servir nun parto co mollo de mostaza. Botarlle por riba un chisco de perexil picado.