Coxa de polo con alcachofas e patacas

Ingredientes para 4 persoas

8 coxas de polo sen óso e sen pel Bon Pollo
8 alcachofas
2 cebolas
3 dentes de allo
2 patacas
½ limón
30 g de abelás torradas
200 g de salsa de tomate
1 L de caldo de polo
200 ml de viño branco
½ presada de perexil fresco
Aceite de oliva
Sal
Pementa negra

Se preparas esta receita de coxa de polo con alcachofas e patacas, asegúrate primeiro de teres cerca unha barra de pan para mollar na salsa. Que delicia!

Apunta os ingredientes: coxas de polo, alcachofas, cebola, allo e patacas. Só con isto xa tes un pratazo. Mais agora vén o mellor: a salsa. Vas necesitar o zume de medio limón, unhas poucas abelás, salsa de tomate, caldo de polo e un vasiño de viño branco. Xa che dixemos que vas necesitar pan!

Engádelle un chisco de perexil fresco no prato para lograr un acabado de dez.

Elaboración

  1. Pelar e picar as cebolas en dados medianos (mirepoix). Reservar. 
  2. Pelar e picar os dentes de allo (sen o xerme) en dados pequenos (brunoise). Reservar.
  3. Pelar e escachar as patacas. Reservar. 
  4. Cortar as coxas de polo en cuartos. Reservar. 
  5. Quitarlles as primeiras follas verdes ás alcachofas, pelarlles o talo, cortarlles a punta e abrir pola metade. Retirarlles os pelos interiores e partir en cuartos. Reservar nun cunco con auga e un chisco de zume de limón. Reservar. 
  6. Cun procesador de alimentos, triturar medio dente de allo cunhas abelás, un chorriño de zume de limón, 50 ml de aceite, o perexil e un chisco de sal e pementa. Procesar ata obter unha pasta. Reservar o picado. 
  7. Quentar un chisco de aceite nunha cazola e rustrir as cebolas cos allos a lume medio. Salpementar. 
  8. Desglasar coa metade do viño branco e subir o lume para que se evapore o alcohol.
  9. Engadir as coxas de polo e refogar durante uns minutos a lume medio. 
  10. Incorporar a salsa de tomate, o caldo, o resto do viño branco e as patacas. Cocer durante 22 minutos a lume medio. 
  11. Engadir as alcachofas e cociñar tapado durante 5 minutos máis. Salpementar. 
  12. Incorporar o picado de abelás e refogar durante 3-4 minutos máis. 
  13. Para empratar, servir a coxa de polo guisada con alcachofas e patacas nun prato fondo e botarlle por riba un pouco de perexil picado. Acompañar cunhas rebandas de pan.

A coxa é unha das nosas partes favoritas do polo. Ofrecémosche outra receita perfecta para guisar: coxas de polo con salsa balsámica. Goza do pracer de cociñar… e de comer!