Coxa de polo con rustrido de verduras e olivas

Como xa sabedes, o polo é un alimento moi nutritivo e lixeiro que nos ofrece un amplo abano de opcións na cociña. Para este prato escollemos a coxa, unha das partes máis saborosas do polo. E para lle engadir un toque extra de sabor e intensidade, apostamos por un riquísimo rustrido de verduras e olivas que casa perfectamente con este corte. Sen dúbida, unha receita que te fará desfrutar.

Elaboración

1. Pelar e picar as cebolas, o pemento vermello, a cenoria e os tomates (sen pebidas) en dados medianos (mirepoix). Reservar.
2. Picar ben os dentes de allo. Reservar.
3. Nunha tixola, quentar un chisco de aceite de oliva e dourar as coxas. Salpementar e reservar.
4. Na mesma tixola, rustrir as cebolas cun chisco de aceite. A media cocción incorporarlle os dentes de allo, a cenoria, o pemento e, por último, os tomates coas follas de loureiro e as ramas de tomiño. Sofritir ata que estea dourado. Salpementar.
5. Engadir o viño tinto e deixar a reducir a lume medio ata que quede reducido á metade.
6. Incorporarlle o caldo e as coxas de polo. Cociñar todo xunto entre 5 e 10 minutos a lume medio-baixo. Á metade da cocción, incorporarlle as olivas e salpementar ao gusto.
7. Servir as coxas de polo quentes cun pouco de rustrido de verduras e olivas

Se che gustan os sofritos e as salsas como acompañamento, non podes perder estas coxas de polo marinadas con cremosa salsa de espinacas.