1 h 15 min
Fácil
Non hai dúbida de que a receita de hoxe entra polos ollos! Esa cor laranxa tan cálida e rechamante da crema de cenoria e abelás e moi apetecible. Ademais, a súa textura cremosa contrasta coa consistencia do polo especiado e o seu intenso sabor.
Esta crema de cenoria e abelás con polo especiado é ideal para servir como prato principal. Desfruta dunha receita saudable que che vai dar as vitaminas da cenoria e toda a proteína que precisas grazas ao polo.
Un consello: pica os solombos de polo en dados de tamaño mediano para conseguires a presentación perfecta.
Elaboración
- Cortar os solombos de polo en dados medianos. Reservar.
- Relar a pel do limón. Reservar.
- Botar a carne nun cunco coa mostaza de Dijon, un chorriño de aceite, un chisco de reladura de limón, noz moscada, xenxibre, pemento en po, sal e pementa. Mesturar ben para enchoupar o polo. Deixar a adobar na neveira durante 1 hora.
- Pelar e picar a cebola, os dentes de allo e as cenorias en dados medianos (mirepoix). Reservar.
- Pelar e cortar o allo porro en toros. Reservar.
- Picar as abelás cun coitelo. Reservar.
- Quentar un chisco de aceite nunha ola e rustrir a cebola, o allo porro e os allos a lume medio.
- Desglasar co viño branco e subir o lume para que se evapore o alcohol.
- Incorporar as cenorias, as fabas e as abelás. Refogar durante un par de minutos a lume medio. Salpementar.
- Engadir o caldo e deixar a ferver tapado durante 15-25 minutos a lume medio. Reservar.
- Triturar a mestura resultante cun procesador de alimentos ata obter unha crema homoxénea e fina. Rectificar ao gusto e reservar quente.
- Quentar un chisco de aceite nunha tixola e dourar o polo adobado a lume medio.
- Para empratar, servir a crema de cenoria e abelás nun prato fondo e incorporar os dados de polo especiado e un chorriño de aceite.
Se a cenoria é unha das hortalizas que non pode faltar nos teus pratos, proba esta receita de polo con fiúncho, cenoria e garavanzos.