
Como sabedes, cociñar con ingredientes de tempada sempre é unha boa opción para obtermos unha receita saborosa e saudable.
Hoxe propómosche un delicioso cuscús con polo e espárragos. Doado de preparar, moi rico en nutrientes e, ademais, feito con alimentos de tempada, como os espárragos, pois agora, na primavera, é o mellor momento do ano para degustalos.
Como toque final engadimos unha rica vinagreta de laranxa que lle vai dar frescura e sabor ao noso cuscús de polo e espárragos.
Mira como se prepara, paso a paso, no enlace da nosa bío.
Elaboración
- Pelar e picar a cebola, os dentes de allo e as cenorias en dados pequenos (brunoise). Reservar.
- Lavar e picar o pemento verde (sen as partes brancas nin as sementes) en dados pequenos (brunoise). Reservar.
- Relar a pel e espremer o zume da laranxa. Reservar por separado.
- Lavar e partir os espárragos despois de quitarlles a parte inferior. Reservar.
- Partir en anacos as ameixas e as améndoas cun coitelo. Reservar.
- Quentar un pouco de aceite nunha tixola e dourar o estufado de coxa cun chisco de reladura de laranxa e herbas provenzais. Salpementar e reservar.
- Na mesma tixola, rustrir a cebola cos allos a lume medio.
- Desglasar co viño branco e subir o lume para que se evapore o alcohol.
- Incorporar as cenorias, o pemento, os espárragos, as ameixas e as améndoas. Mesturar e refogar durante uns minutos a lume medio. Salpementar.
- Engadir as espinacas, o cuscús, o polo e o caldo. Mesturar e cocer durante 3-4 minutos tapado a lume medio-baixo. Reservar.
- Cun procesador de alimentos, triturar 150 ml de zume de laranxa coa mostaza, o mel, o vinagre, unhas follas de menta, un chorriño de aceite e un chisco de sal e pementa. Procesar ata obter unha vinagreta homoxénea.
- Para empratar, servir o cuscús de polo e espárragos nun prato e botarlle un pouco de vinagreta de laranxa por riba. Mesturar e servir morno.
Gustouche esta receita? Bota un ollo pola nosa web para atopares as opcións que máis che apetezan.