1 h
Fácil
A gastronomía africana engloba receitas moi sorprendentes. Hoxe queremos compartir unha convosco: este delicioso cuscús de brócoli con polo e salsa de iogur, perfecto para unha comida saudable e moi saborosa.
O que máis nos gusta desta elaboración é que se substitúe a habitual sémola de trigo por brócoli, de xeito que é apta para celíacos e menos calórica. Ademais, a salsa de iogur que a acompaña é moi refrescante: vaiche gustar tanto que quererás ter sempre un pouco na neveira!
Elaboración
- Cortar os filetes de peituga de polo en tiras medianas. Reservar.
- Relar o brócoli. Reservar.
- Pelar e picar a cebola e os dentes de allo en dados pequenos (brunoise). Reservar.
- Lavar e picar en dados pequenos (brunoise) a cabaciña e o pemento vermello retirando as partes brancas e as sementes. Reservar.
- Espremer o zume dun limón. Reservar.
- Picar as abelás cun coitelo. Reservar.
- Quentar un chisco de aceite nunha tixola e rustrir a cebola cun dente e medio de allo a lume medio. Salpementar.
- Incorporar as verduras restantes (cenorias, cabaciña e pemento vermello) e as pasas. Salpementar e refogar durante 5 minutos.
- Engadir o brócoli relado e un chisco de sal. Cociñar todo xunto durante 5 minutos a lume medio e remexendo de cando en vez. Reservar.
- Quentar un chisco de aceite nunha tixola e cociñar as tiras de polo a lume medio.
- Desglasar coa salsa de soia e unhas pingas de Tabasco (ao gusto). Cociñar durante un par de minutos e deixar a arrefriar.
- Esfiañar as tiras de polo coas mans. Reservar.
- Cun procesador de alimentos, triturar o iogur, o medio dente de allo restante, un chorriño de zume de limón, unhas follas de hortelá picadas, 30 ml de aceite e un chisco de sal e de pementa. Procesar ata obter unha salsa homoxénea.
- Para empratar, servir o cuscús de brócoli e engadirlle o polo esfiañado por riba. Decorar coas abelás picadas e acompañar coa salsa de iogur.
Se che gustou este exótico cuscús de brócoli, encantarache a receita de blanquetas ao curry de mazá e brócoli que preparamos.