Delicias de polo con salsa de amorodos

Ingredientes para 4 persoas

12 delicias de polo Bon Pollo
4 chalotas
4 dentes de allo
250 g de amorodos
1 laranxa
1 caiena
15 g de manteiga
100 ml de brandy
200 ml de caldo de polo
2 flores de anís estrelado
Loureiro
Tomiño fresco
Aceite de oliva
Sal
Pementa negra

Hoxe propomos esta receita tan fresca e innovadora de delicias de polo con salsa de amorodos. Si, de amorodos.

Sabemos que pode parecer unha mestura estraña, mais a dozura dos amorodos e a laranxa, unida ao toque picante da caiena, combinan perfectamente coas nosas delicias de polo. Se estás a cociñar para os máis pequenos ou para padais delicados, podes axustar a cantidade de caiena ou mesmo prescindir dela.

Para empratar, recomendámosche debuxar unha lágrima coa salsa dos amorodos, colocar as delicias de polo e adornar cunhas follas de tomiño. Deste xeito, o prato, ademais de saboroso, tamén vai destacar polo seu aspecto e cores brillantes.

O polo vaiche quedar cun toque de verán que, sen dúbida ningunha, vai sorprender gratamente a todos os convidados. Unha receita sinxela, pero digna dos restaurantes de máximo nivel.

Elaboración

  1. Pelar e picar as chalotas e dous dentes de allo en dados pequenos (brunoise). Reservar.
  2. Machucar dous dentes de allo. Reservar.
  3. Lavar e partir os amorodos en cuartos. Reservar.
  4. Relar a pel espremer a laranxa. Reservar a pel e o zume por separado.
  5. Desfacer a manteiga nunha tixola cos allos machucados e unhas ramas de tomiño a lume medio.
  6. Incorporar as delicias de polo e douralas. Salpementar.
  7. Engadir 100 ml de caldo de polo e cocer durante 10 minutos dándolles volta de cando en vez. Reservar.
  8. Quentar un chisco de aceite nun cazo e rustrir as chalotas, os allos e a caiena (ao gusto) a lume medio. Salpementar.
  9. Desglasar co brandy e subir o lume para que se evapore o alcohol.
  10. Incorporar os amorodos, un chisco de reladura e 150 ml de zume de laranxa, o caldo, as flores de anís e unhas follas de loureiro. Mesturar e cocer durante 10 minutos a lume medio.
  11. Triturar cun procesador de alimentos a elaboración anterior, retirando as flores de anís e loureiro, ata obter unha salsa homoxénea e lisa.
  12. Para empratar, debuxar unha lágrima coa salsa de amorodos e colocar tres delicias de polo no prato. Botarlle por riba un pouco tomiño e servir.