Delicias de polo con texturas de alcachofa e lima

Ingredientes para 4 persoas

2 bandexas de delicias de polo de Bon Pollo
2 cebolas
3 dentes de allo
10 alcachofas
40 g de espinacas frescas
2 limas
1 limón
500 ml de auga mineral
50 g de manteiga
75 ml de viño branco
Fariña triga
Allo en po
Alfabaca fresca
Aceite de oliva
Sal
Pementa negra

Non podiamos deixar pasar a tempada de alcachofas sen renderlles homenaxe cunha receita coma a de hoxe: delicias de polo con texturas de alcachofa e lima.

A alcachofa é unha hortaliza que dá moito xogo na cociña e que funciona de marabilla como acompañamento do polo. Ademais, se a cociñas en diferentes texturas, o resultado é irresistible. Na nosa proposta-homenaxe desta semana, preparamos un mollo e uns chips fritidos para acompañar como é debido as nosas saborosas delicias de polo.

Elaboración

  1. Pelar e picar os dentes de allo (sen o xerme) en dados pequenos (brunoise). Reservar. 
  2. Picar finiñas dúas ramas de alfabaca. Reservar. 
  3. Relar a pel e espremer as limas. Reservar por separado. 
  4. Mesturar nun cunco as delicias de polo cun chorriño de aceite, o zume das limas, a alfabaca picada e un chisco de allo en po. Salpementar e reservar na neveira durante 1 hora envolto en papel filme. 
  5. Pelar e picar as cebolas en dados medianos (mirepoix). Reservar.
  6. Tirar as primeiras follas de 4 alcachofas, pelar o talo e cortalas en xuliana fina para elaborar os chips. Partir as restantes pola metade e en xuliana fina. Reservar nun cunco con auga e un chisco de zume de limón e deixalo na neveira tapado cun papel de cociña para evitar que se oxiden. 
  7. Quentar un chisco de aceite de oliva nunha cazola e rustrir as cebolas cos allos a lume medio. 
  8. Desglasar co viño branco e subir o lume para que se evapore o alcohol. 
  9. Incorporar as alcachofas en xuliana e sofritir a lume forte durante 2 minutos. Salpementar. 
  10. Engadirlle a auga mineral, levar a ebulición e engadir as espinacas con 20 follas de alfabaca. Cocer todo xunto durante 5 minutos. 
  11. Triturar o rustrido de alcachofas cun procesador de alimentos engadindo a manteiga e a reladura das limas. Coar cun coador fino e rectificar a cantidade de sal e pementa ao gusto. 
  12. Secar ben os chips de alcachofas e rebozar coa fariña. Reservar. 
  13. Fritir suavemente os chips de alcachofas. Reservar nun prato con papel absorbente e engadirlle un chisco de sal. 
  14. Cociñar as delicias de polo nunha tixola a lume medio (sen engadirlle aceite). 
  15. Para empratar, debuxar un círculo co mollo de alcachofas e pousar tres delicias de polo enriba. Decorar cos chips de alcachofas e unhas folliñas de alfabaca fresca. 

Bota unha ollada a outras receitas da nosa páxina web, como esta coxa con verduras e olivas salteadas.