50 min
Fácil
Non perdas esta deliciosa e versátil receita de quiche de polo e cogomelos. A quiche, un tipo de pastel salgado procedente da cociña francesa, elabórase cunha preparación de ovos batidos, crema de leite e diversas verduras ou carnes nunha base de masa quebrada. En Bon Pollo optamos por un recheo con moitísimo sabor partindo de dous elementos principais: o polo e os cogomelos. Soa delicioso, non si? Pois non lle deas máis voltas e comeza a preparala!
Elaboración
- Cortar as peitugas de polo en tiras non moi grosas. Reservar.
- Picar a cebola en dados grandes (mirepoix). Reservar.
- Picar os cogomelos máis grandes en cuartos. Reservar.
- Quentar un pouco de aceite nunha tixola e dourar as tiras de polo a lume alto. Salpementar e reservar á parte.
- Na mesma tixola, rustrir as cebolas a lume medio durante uns minutos. Salpementar.
- Engadirlle o viño branco e cociñar ata que se evapore o alcohol.
- Engadir os cogomelos e refogar un par de minutos. Engadir as tiras de polo e o tomiño. Cociñar durante 5 minutos a lume medio.
- Forrar un molde de forno con papel vexetal e estender a masa quebrada. Picalo cun garfo e pousarlle un peso enriba para que a masa non inche. Meter ao forno a 180 °C durante 10 minutos aproximadamente.
- Nun cunco, bater os ovos e engadir a nata líquida. Incorporarlle o rustrido dos cogomelos, as tiras de polo (non botar o tomiño) e mais o queixo relado. Salpementar ao gusto.
- Verter a mestura no molde e meter ao forno a 180 °C durante 35-40 minutos ata que quede callado.
- Empoar o ceboliño picado por riba da quiche e servir.
Se non podes resistirte a unha deliciosa quiche, proba esta receita de quiche de polo con cabaza e cogomelos.