Ensalada de polo con paínzo, figos e queixo

Nestes días tan calorosos é moi importante estarmos ben hidratados e consumir alimentos frescos e ricos en vitaminas e minerais. Por iso, desde Bon Pollo, propómosche unha receita perfecta para combater estas temperaturas: ensalada de polo con paínzo, figos e queixo.

Os figos e o queixo de cabra vanlle dar a este prato todo o sabor, mentres que a rúcula e a mazá serán a base de todo o frescor. Ademais, esta froita vaille dar un toque de acidez e o paínzo e as noces, unha textura difícil de igualar.

Unha receita doada e rápida de facer, que nos vai dar a enerxía necesaria para lle facermos fronte ao verán.

Elaboración

1. Cortar as coxas de polo en dados medianos. Reservar.
2. Pelar e picar a mazá en dados medianos (mirepoix). Reservar.
3. Lavar e partir os figos en cuartos. Reservar.
4. Esmigallar o queixo de cabra. Reservar.
5. Ferver o caldo nunha ola e incorporar o paínzo. Cocer durante 12 minutos a lume medio-baixo e tapado co testo. Estirar nunha bandexa e deixar a arrefriar.
6. Triturar cun procesador de alimentos a mazá e 20 ml de zume de limón ata obter un puré.
7. Incorporar 30 ml de aceite, o vinagre e un chisco de sal. Volver procesar ata obter unha vinagreta cremosa e fina. Reservar na neveira.
8. Quentar un chisco de aceite nunha tixola e cociñar os dados de polo a lume medio. Salpementar e engadirlle un chisco de curry e de cúrcuma. Reservar.
9. Para montar a ensalada, pór na base do prato un pouco de rúcula co paínzo, os figos, o queixo, as noces e os dados de polo.
10. Para empratar, servir a ensalada de polo con millo, figos e queixo, e acompañar coa vinagreta de mazá.