Ensalada de verán con delicias de polo

Ensalada de verán con delicias de polo

Ingredientes para 4 persoas

1 bandexa de delicias de polo de Bon Pollo
150 g de quinoa
200 g de fabas brancas cocidas
1 dente de allo
1 remolacha cocida
1 bolsa de canónigos, ou herba dos cóengos
100 g de tomates cereixa
1 aguacate
80 g de queixo feta
100 g de framboesas
1 limón
60 ml de vinagre de Xerez
40 ml de salsa de soia
20 g de azucre
Pemento vermello en po
Coandro fresco
Sésamo branco
Aceite de oliva
Sal
Pementa negra

Ensalada de verán con delicias de polo

Como apetecen as ensaladas no verán! Hoxe traémosvos unha moi orixinal, con quinoa, hummus de remolacha, delicias de polo e unha vinagreta moi refrescante. Xa vos veu a fame?

Trátase dun prato lixeiro, pero que nos vai saciar o apetito porque contén ingredientes con moitas proteínas e carbohidratos como o polo, os legumes, a quinoa e o aguacate. Así poderemos alimentarnos de xeito saudable e, ao tempo, pasar sen fame ata a próxima comida.

Elaboración

  1. Pelar e picar un dente de allo (sen o xermolo) en dados pequenos (brunoise). Reservar.
  2. Picar a remolacha en dados medianos (mirepoix). Reservar.
  3. Lavar e partir os tomates pola metade. Reservar.
  4. Relar a pel e espremer o zume do limón. Reservar por separado.
  5. Pelar e picar o aguacate en dados medianos (mirepoix). Reservar na neveira cun chorriño de zume de limón.
  6. Esmigallar o queixo feta. Reservar.
  7. Remollar a quinoa nun cunco con auga durante 20 minutos. Escoar e lavar ben.
  8. Ferver 300 ml de auga nunha ola e incorporar a quinoa. Cocer a lume medio-baixo durante 12 minutos. Estirar nunha bandexa e deixar a arrefriar.
  9. Triturar cun procesador de alimentos as fabas, o allo, a remolacha, 15 ml de aceite, 15 ml de auga mineral, un chisco de pemento en po, sal e pementa. Procesar ata obter un hummus homoxéneo. Rectificar ao gusto e reservar na neveira.
  10. Mesturar nun cunco o vinagre, a salsa de soia, 60 ml de aceite, o azucre, a reladura de limón, unhas follas de coandro picadas e un chisco de sementes de sésamo. Mesturar ata obter unha vinagreta homoxénea. Reservar.
  11. Quentar un chisco de aceite nunha tixola e cociñar as delicias de polo a lume medio. Salpementar.
  12. Incorporar a metade da vinagreta anterior e cocer durante uns minutos máis. Reservar.
  13. Para montar a ensalada, pór unha base de canónigos (tamén coñecidos como herba dos cóengos) con quinoa e incorporar os tomates, as framboesas, o aguacate, o queixo feta, o hummus de remolacha e as delicias de polo.
  14. Para empratar, servir a ensalada de verán con delicias de polo e acompañar coa vinagreta. Botarlle un chisco de sésamo branco por riba.

Se queres preparar outras ensaladas de verán, recomendámosche esta refrescante ensalada de quinoa e polo con aguacate e mango.