Escalopes recheos de champiñóns con salsa de caqui

Escalopes recheos de champiñóns con salsa de caqui

Ingredientes para 4 persoas

2 bandexas de escalopes de Bon Pollo
4 chalotas
2 cebolas
4 dentes de allo
700 g de champiñóns
150 ml de viño branco
50 g de manteiga
100 g de mel de flores
40 ml de salsa de soia
2 cenorias
4 caquis tenros
2 laranxas
Cúrcuma en po
Romeu fresco
Tomiño fresco e seco
Ceboliño
Aceite de oliva
Sal
Pementa negra

Escalopes recheos de champiñóns con salsa de caqui

Se estás a buscar ideas para sorprender os teus convidados neste Nadal, a nosa proposta de hoxe vaiche gustar: escalopes recheos de champiñóns con salsa de caqui.

Sigue todos os pasos para obter unha salsa cremosa, cun punto doce irresistible, e cubre con ela os nosos escalopes, que terás que encher previamente con champiñóns rustridos. Con esta receita vas dar no cravo!

Elaboración

  1. Salpementar os escalopes de polo. Reservar. 
  2. Nun cunco, mesturar o mel coa salsa de soia, un bo chorro de aceite de oliva, tomiño e romeu fresco. Macerar os escalopes durante unha hora na neveira envoltos en papel filme. 
  3. Pelar e picar as chalotas, as cebolas, os allos (sen o xerme) e os champiñóns en dados moi miúdos (brunoise). Reservar. 
  4. Pelar e picar as cenorias e os caquis en dados medianos (mirepoix). 
  5. Espremer as laranxas. Reservar. 
  6. Desfacer a manteiga nunha tixola a lume medio. Rustrir as chalotas con dous allos a lume medio ata que queden acaramelados. Salpementar. 
  7. Desglasar coa metade do viño branco e subir o lume para que se evapore o alcohol. 
  8. Incorporar os champiñóns e un chisco de tomiño seco (ao gusto). Refogar durante 15 minutos a lume medio. Rectificar a cantidade de sal e pementa. Reservar. 
  9. Rustrir as cebolas cos dous allos restantes nunha tixola a lume medio. Salpementar. 
  10. Engadir as cenorias e refogar un par de minutos. 
  11. Engadir os caquis, o zume de laranxa e o viño branco restante. Cocer todo xunto durante 10 minutos a lume medio. 
  12. Incorporarlle a cúrcuma (ao gusto) e triturar cunha procesadora de alimentos. Reservar e rectificar as especias ao gusto. 
  13. Estirar un escalope de polo macerado e colocar no centro unhas culleradas do rustrido de champiñóns. Cubrir con outro escalope e cerrar cuns paus. Repetir o proceso ata terminar con todos os escalopes. 
  14. Colocar os escalopes de polo recheos nunha bandexa de forno cun chorriño de aceite e meter no forno a 200 °C durante 20 minutos.
  15. Para empratar, debuxar un círculo coa salsa de caqui e colocarlle enriba o escalope de polo recheo de champiñóns. Decorar con ceboliño picado.

Por se queredes máis ideas, deixámosvos outra receita de escalopes de polo, esta vez acompañada de bulgur e verduras.