Estufado de polo con abelás e tomiño

Ingredientes para 4 persoas

1 bandexa de polo partido de Bon Pollo
2 cebolas
3 dentes de allo
4 tomates pera
1 pataca
2 cenorias
100 g de ervellas
200 g de cogomelos variados
50 g de abelás
80 ml de viño tinto
1 litro de caldo de polo
Fariña triga
8 follas de loureiro
Tomiño fresco
Perexil fresco
Aceite de oliva
Sal
Pementa negra

Un estufado de polo sempre apetece nos días máis fríos. Este prato tan tradicional ten moitísimas variantes, e en cada casa cocíñase de xeito distinto. O certo é que o estufado se pode elaborar con calquera verdura e sempre vai quedar rico, mais o elemento que non pode faltar é o polo da mellor calidade. 

Nesta receita amosámosche, paso a paso, como se elabora un estufado de polo con abelás e tomiño. Descubre o interesante sabor que lle dan os froitos secos á receita. 

Un consello: non sexas impaciente e respecta o tempo de cocción, a lume medio-baixo durante unha hora aproximadamente. A espera vai valer a pena e a carne vaiche quedar tenra e saborosa. Unha vez servido o estufado, non esquezas acompañalo con pan: vas querer repañar o prato.

Elaboración

  1. Pelar e picar as cebolas, os dentes de allo (sen o xerme) e as cenorias en dados pequenos (brunoise). Reservar.
  2. Pelar e escachar a pataca. Reservar.
  3. Lavar, retirar as sementes e picar os tomates en dados pequenos (brunoise). Reservar.
  4. Pelar e partir os cogomelos en cuartos. Reservar.
  5. Enfariñar o polo partido. Reservar. 
  6. Triturar cun procesador de alimentos un dente de allo, as abelás, un chorriño de aceite, un chisco de perexil, sal e pementa. Non fai falta triturar completamente; poden quedar anaquiños de abelá sen triturar. Reservar. 
  7. Quentar nunha cazola grande un chisco de aceite de oliva e dourar os anacos de polo a lume medio. Reservar.
  8. Na mesma cazola, sofritir as cebolas cos dous allos restantes a lume medio. 
  9. Desglasar co viño tinto e subir o lume para que se evapore o alcohol.
  10. Incorporar as cenorias, os cogomelos, as ervellas, os tomates e a pataca. Salpementar, engadir as follas de loureiro e unhas ramas de tomiño, e cocer a lume medio durante 5 minutos.
  11. Engadir os anacos de polo co caldo. Tapar e cocer todo xunto a lume medio-baixo durante 1 hora. Nos últimos minutos, engadir a mestura de abelás anterior e mesturar. Rectificar a cantidade de sal e pementa (ao gusto). 
  12. Deixar repousar o estufado fóra do lume durante un par de minutos.
  13. Servir o estufado de polo nun prato e botarlle un pouco de perexil picado por riba.