1 h
Fácil
En Bon Pollo cremos que a alimentación sa non ten por que prescindir do sabor máis delicioso. Por iso nos propuxemos preparar estes nuggets de polo e cenoria, unha alternativa máis saudable ca a versión tradicional e que lles vai gustar a todos.
A masa elabórase con ingredientes de primeira calidade: polo, chalotas e cenorias. Ademais, poderás evitar o exceso de graxa, xa que no canto de fritir os nuggets, pódelos meter ao forno. Para rematar estes manxares tan gorentosos, esquece a maionesa e o ketchup: proba a nosa salsa de iogur e curry, tan orixinal como saborosa.
Están para lamber os fociños!
Elaboración
- Prequentar o forno a 200 °C.
- Cortar as peitugas de polo en dados medianos. Reservar.
- Pelar e partir as chalotas e as cenorias. Reservar.
- Partir os flocos de millo. Reservar.
- Procesar cunha picadora os dados de polo, as chalotas, as cenorias e un chisco de sal e de pementa ata obter unha masa.
- Elaborar os nuggets: coller un pouco de masa de polo e darlle forma coas mans.
- Pasar os nuggets por fariña, ovo batido e polos flocos de millo picados.
- Pintar cun chisco de aceite os nuggets de polo e cenoria e meter no forno nunha bandexa de forno durante 35-40 minutos a 200 °C, ata que che queden ben dourados.
- Triturar cun procesador de alimentos o iogur, unhas follas de menta picadas, un chorriño de zume de limón e de aceite e mais un chisco de curry, de sal e de pementa. Procesar ata obter un mollo homoxéneo.
- Para empratar, servir os nuggets de polo e cenoria nun prato e acompañar co mollo.