Pastel de pataca e polo

Ingredientes para 2 persoas

6 solombos de polo Bon Pollo
1 cebola
1 dente de allo
1 cenoria
2 patacas
½ rama de apio
250 g de salsa de tomate
40 g de queixo relado
50 g de manteiga
50 ml de leite
Follas de loureiro
Noz moscada
Aceite de oliva
Sal
Pementa negra

2 moldes individuais

Os pasteis salgados son unha opción estupenda para te lucires en celebracións e xuntanzas con familiares e amigos: son doados de preparar, requiren poucos ingredientes e, sobre todo, estanche deliciosos!

Este pastel de pataca e polo consta de dúas elaboracións: por unha banda, terás que cociñar un puré de pataca cremoso e, pola outra, un recheo de verduriñas e polo. Só che quedará montar o prato por camadas e levalo ao forno para gratinar.

A seguir deixámosche todos os pasos para preparares esta receita. E no noso Instagram atoparás a versión en vídeo. A desfrutar!

Elaboración

  1. Partir os solombos de polo en dados medianos, as verduras en dados pequenos (brunoise), e escachar as patacas.
  2. Ferver nunha ola as patacas durante 20 minutos. Escoar e deixar a arrefriar.
  3. Nun cunco, esmagar as patacas e incorporar a manteiga, o leite e un chisco de sal e noz moscada. Mesturar e reservar o puré.
  4. Quentar un chisco de aceite nunha tixola e cocer os dados de polo coas verduras e unhas follas de loureiro a lume medio. Salpementar.
  5. Incorporar a salsa de tomate. Refogar durante 5 minutos a lume lento.
  6. Esparexer en dous moldes individuais unha base de puré de pataca, un pouco de rustrido de polo e unha camada máis de puré de pataca. Botarlle o queixo relado por riba.
  7. Gratinar.
  8. Para empratar, servir unha ración do pastel de pataca e polo nun prato. Vaiche encantar!