50 min
Fácil
Hai por aquí algún fan das hamburguesas? Hoxe traemos unha receita que vos vai encantar: hamburguesa de polo de crecemento lento con salsa de tomate, queixo e cebola.
Hai mil maneiras diferentes de desfrutar dunha hamburguesa. Nesta ocasión, escollemos os ingredientes que normalmente colocariamos entre dous pans, preparámolos ao forno e triturámolos ata formar un mollo de campionato.
Pero o mellor desta receita é, sen dúbida, a saborosa hamburguesa de polo de crecemento lento. Próbaa e notarás a diferenza.
Elaboración
- Prequentar o forno a 200 °C.
- Pelar e partir as cebolas en xuliana fina. Reservar.
- Pelar os dentes de allo. Reservar.
- Lavar os tomates cereixa. Reservar.
- Quentar un chisco de aceite nunha tixola e rustrir as cebolas durante 10 minutos a lume medio.
- Desglasar coa salsa de soia e o viño tinto. Subir o lume para que se evapore o alcohol.
- Salpementar e deixar a cocer 10 minutos máis a lume medio. Reservar.
- Pousar os tomates, o queixo e os dentes de allo nunha bandexa de forno e engadirlle un chorriño de aceite, un chisco de ourego, pemento en po, sal e pementa. Meter no forno a 200 °C durante 20 minutos e reservar.
- Triturar a elaboración anterior cun procesador de alimentos engadíndolle un pouco de auga. Procesar ata obter unha salsa homoxénea e lisa. Reservar.
- Quentar un pouco de aceite nunha grella e cocer as hamburguesas de polo a lume medio. Salpementar.
- Para empratar, trazar un círculo coa salsa de tomate e queixo e pousar a hamburguesa de polo nun lateral. Decorar coa cebola caramelizada e un pouco de queixo feta esmiuzado.
Se queres outro lado da hamburguesa de polo de crecemento lento, recomendámosche esta receita, con espárragos e salsa de chícharos.