Polo con fabas, brócoli e alcachofas

Ingredientes para 4 persoas

6 escalopes de polo Bon Pollo
2 cebolas
4 allos tenros
1 kg de fabas frescas
½ brócoli
4 alcachofas
½ limón
50 g de abelás torradas
30 g de mel de flores
20 g de mostaza
10 ml de vinagre de viño tinto
80 ml de viño branco
350 ml de caldo de polo
Comiño en po
Menta fresca
Aceite de oliva
Sal
Pementa negra

Esta receita váleche para todo: pódela preparar calquera día de semana, pero tamén vas quedar como o anfitrión ideal se a cociñas nunha ocasión máis especial.

O segredo deste prato, alén de elaboralo con produtos de calidade, está na vinagreta final. A fusión de mel e mostaza fai que este mollo sexa un dos máis queridos, xa que conserva toda a dozura do mel e o sutil punto picante da mostaza. Ademais é o adubo perfecto para a carne de ave. Por iso en Bon Pollo suxerímosche que elabores unha vinagreta con estes ingredientes para acompañares o polo con fabas, brócoli e alcachofas.

Se che gustou esta receita e es amante de combinar o polo con verduras coma as que propomos hoxe, non podes quedar sen probar as blanquetas de polo ao curry con mazá e brócoli. Sen dúbida, outra receita para mollar pan. Literalmente.

Elaboración

  1. Cortar os escalopes de polo en dados medianos. Reservar.
  2. Pelar e picar as cebolas en dados pequenos (brunoise). Reservar.
  3. Pelar e picar os allos tenros en toros medianos. Reservar.
  4. Debullar as fabas. Reservar.
  5. Quitarlles as primeiras follas verdes ás alcachofas, pelarlles o talo, cortarlles a punta e abrir pola metade. Retirarlles os pelos interiores e partir en cuartos. Reservar nun cunco con auga e un chisco de zume de limón.
  6. Lavar e cortar as inflorescencias do brócoli en anacos medianos. Reservar.
  7. Partir as abelás cun coitelo. Reservar.
  8. Quentar un chisco de aceite nunha cazola e dourar os dados de polo cun pouco comiño, sal e pementa. Reservar.
  9. Na mesma cazola, rustrir as cebolas e os allos tenros a lume medio. Salpementar.
  10. Desglasar co viño branco e subir o lume para que se evapore o alcohol.
  11. Incorporar as fabas, as alcachofas e o brócoli. Cociñar durante 5 minutos a lume medio baixo.
  12. Engadir os dados de polo, as abelás e o caldo. Mesturar e cocer tapado durante 10 minutos máis. Reservar.
  13. Cun procesador de alimentos, mesturar 60 ml de aceite, o mel, a mostaza, o vinagre e un chisco de sal e pementa. Procesar ata obter unha vinagreta homoxénea.
  14. Para empratar, servir o polo con fabas, brócoli e alcachofas nun prato, botarlle por riba un chisco de menta picada e botarlle tamén a vinagreta (ao gusto).