Polo con fiúncho, cenoria e garavanzos

Hai sabores que realzan o gusto e a textura do polo. Presentámosche unha combinación infalible: polo con fiúncho, cenoria e garavanzos.

Esta proposta ten truco. Primeiro, maceramos os cuartos traseiros do polo con cítricos para lles dar un toque chispeante e fresco e, a seguir, metémolos ao forno coas verduras, regando todo con caldo de polo para lograr un acabado máis saboroso. O resultado é un prato san, equilibrado e incriblemente saboroso.

Elaboración

1. Pelar as chalotas e os dentes de allo. Reservar. 
2. Pelar e picar as cenorias en toros medianos. Reservar. 
3. Lavar e picar o fiúncho en xuliana. Reservar. 
4. Relar a pel e espremer o zume do limón e da lima. Reservar por separado. 
5. Picar o coandro. Reservar. 
6. Pelar o cardamomo. Reservar as sementes. 
7. Torrar nunha tixola, sen engadirlles aceite, as sementes de comiño, as sementes de cardamomo e as flores de anís estrelado. 
8. Moer cun procesador de alimentos as sementes ata obter un po. Reservar.
9. Mesturar nunha bandexa o zume e a pel dos cítricos (limón e lima), o po das sementes (ao gusto), o viño, un chisco de coandro picado e un chorriño de aceite de sésamo. Macerar os cuartos traseiros na elaboración anterior durante 2 horas e 30 minutos na neveira. 
10. Prequentar o forno a 180 °C. 
11. Incorporar na mesma bandexa do macerado as verduras (chalotas, allos, cenorias e fiúncho), os garavanzos e o caldo. Salpementar.
12. Asar no forno os cuartos traseiros durante 40 minutos, e, cada 15 minutos, ir botándolle por riba o mollo que hai na bandexa. 
13. Darlle a volta ao polo e cociñar durante 45 minutos máis. Ir vertendo o mollo por riba do polo.
14. Para servir, colocar un cuarto traseiro de polo nun prato e acompañar coas chalotas, o fiúncho, as cenorias e os garavanzos. 

Se che gustan os pratos picantes, tamén che gustará cociñar estas aliñas de polo á cervexa con romeu.