Polo de Nadal reenchido

Ingredientes para 4 persoas

1 polo enteiro eviscerado de Bon Pollo
4 chalotas
1 mazá reineta
2 laranxas
2 patacas
4 g de xenxibre
50 g de améndoas torradas
50 de dátiles sen carabuña
50 g de ameixas deshidratadas
30 g de piñóns
150 ml de caldo de polo
100 ml de brandy de Xerez
Manteiga de porco
Romeu fresco
Tomiño fresco
Aceite de oliva
Sal
Pementa negra

Se es dos que agarda a chegada do Nadal con ilusión e ledicia, esta receita vaite fascinar: polo de Nadal reenchido.

As festas do Nadal son especiais e máxicas porque nos fan vivir momentos de ledicia e lembranzas e compartimos experiencias coa familia e os amigos. Goza ao máximo destes marabillosos días sen te preocupares polo que vas cociñar.

O sabor tradicional dun bo polo reenchido será o toque central da túa celebración (e da túa mesa!). Non se nos ocorre un prato principal máis propio do Nadal ca este.

Un truco para que o polo reenchido estea espectacular: cando o metas ao forno, vai verténdolle o caldo por riba aos poucos para que a carne non che quede seca.

Elaboración

  1. Prequentar o forno a 180 °C.
  2. Pelar as chalotas. Reservar.
  3. Pelar e partir a mazá en cuarteiróns. Reservar.
  4. Partir as laranxas en cuarteiróns. Reservar.
  5. Pelar e picar as patacas. Reservar.
  6. Pelar e picar o xenxibre en dados pequenos (brunoise). Reservar.
  7. Partir os dátiles á metade. Reservar.
  8. Salpementar o polo por dentro e reencher co xenxibre, uns cuarteiróns de mazá e de laranxa, un pouco de améndoas, dátiles, ameixas e piñóns. Coser e atar as patas cun cordel.
  9. Enchoupar ben o polo coa manteiga de porco e salpementar.
  10. Pousar o polo (coas peitugas para abaixo) sobre unha bandexa de forno e engadir os elementos sobrantes do recheo, as patacas, as chalotas e unhas ramas de tomiño e romeu.
  11. Incorporar o caldo de polo e o brandy. Meter ao forno a 180 °C durante 45 minutos e ir verténdolle o caldo que hai na fonte por riba da carne.
  12. Darlle a volta e meter ao forno durante 45-55 minutos máis.
  13. Deixar a repousar o polo dentro do forno apagado durante 5 minutos.
  14. Para empratar, servir o polo de Nadal reenchido nunha bandexa e partir en racións. Decorar cunhas ramas de romeu.

Se estás a buscar máis receitas de Nadal, anímate a preparar estes canelóns reenchidos de polo e acompañados de salsa velouté e queixo gratinado.