Polo macerado con salsa de turrón

Quen di que o turrón ten que ser unha sobremesa? Tamén o podes usar para sorprender con suculentos pratos salgados.

Se non o cres, préstalle atención a esta receita de Nadal. En Bon Pollo atrevémonos a combinar polo macerado cunha cremosa salsa de turrón de Xixona. O resultado é unha auténtica delicia, ideal para conquistares os teus convidados nestas datas.

Elaboración

Cortar as peitugas de polo en dados grandes. Reservar.
Pelar e picar a cebola e o dente de allo (sen o xermolo) en dados pequenos (brunoise). Reservar.
Relar e espremer o limón. Reservar por separado.
Esmigallar o turrón de Xixona. Reservar.
Macerar nun cunco as peitugas de polo coa salsa de soia, a auga mineral, a reladura e o zume do limón, o allo e un chisco de pementa negra. Cubrir con papel filme pegándoo no polo e reservar durante 20 horas na neveira.
Prequentar o forno a 200 °C.
Coar os dados de peituga de polo e meter ao forno cun chisco do líquido do macerado e un chorriño de aceite a 200 °C durante 20 minutos. Reservar.
Quentar un chisco de aceite de oliva nunha tixola e rustrir lixeiramente a cebola. Salpementar.
Desglasar co viño branco e subir o lume para que se evapore o alcohol.
Incorporarlle as améndoas e refogar a lume medio durante uns minutos.
Engadir o turrón, mesturar e verter a nata líquida. Remexer ata que o turrón se funda e a salsa adquira unha textura cremosa. Rectificar a cantidade de sal e pementa ao gusto. Reservar.
Para empratar, debuxar unha liña coa salsa de turrón e colocarlle enriba tres anacos de polo macerado. Relar un pouco de chocolate negro e decorar con grosellas vermellas, améndoas e ceboliño picado.

Buscas máis ideas de receitas de vacacións? Que vos parece este xamón de polo con cava, ameixas e améndoas?