Risotto de polo con queixo de tetilla e cogomelos

Ingredientes para 4 persoas

1 bandexa de escalopes de polo de Bon Pollo
360 g de arroz carnaroli
1 cebola
2 dentes de allo
200 g de cogomelos variados
300 g de queixo de tetilla
100 g de manteiga
740 ml de caldo de polo
100 ml de viño branco
Noces
Aceite de oliva
Sal
Pementa negra

Á parte da pizza e da pasta, o risotto é un dos pratos italianos máis famosos. Existen infinitas combinacións desta receita, e sempre podes innovar segundo os ingredientes que teñas na casa. Nós propómosche un risotto de polo con queixo de tetilla e cogomelos. 

Os cogomelos sempre foron un bo acompañamento para a carne, e a combinación deste ingrediente co polo e o arroz vaite sorprender gratamente. 

Ora ben, que é un risotto sen queixo? Para lle dar un toque final a esta receita, engadímoslle queixo de tetilla de denominación de orixe galega en vez do tradicional parmesano.

Un consello: para que o resultado final sexa un arroz ben meloso e cremoso, a clave está en engadirmos o caldo de polo quente aos poucos e ir remexendo durante todo o proceso.

Elaboración

  1. Cortar os escalopes de polo en dados medianos. Reservar. 
  2. Pelar e picar o queixo de tetilla en dados medianos. Reservar na neveira. 
  3. Pelar e picar a cebola e os cogomelos en dados moi pequenos (brunoise). Reservar. 
  4. Machucar os dentes de allo. Reservar. 
  5. Quentar un chisco de aceite nunha tixola e marcar o polo a lume medio-alto. Salpementar e reservar. 
  6. Na mesma tixola, fundir a manteiga (50 g) e rustrir a cebola cos allos a lume medio. 
  7. Incorporar os cogomelos e sofritir durante uns minutos a lume medio. Botar sal.
  8. Desglasar co viño branco e subir o lume para que se evapore o alcohol. 
  9. Retirar os allos e engadir o polo e o arroz. Cocer durante un par de minutos a lume medio sen deixar de remexer (nacarar). 
  10. Ir engadindo o caldo (morno) aos poucos, a medida que se vaia absorbendo. Cocer todo xunto durante 15-18 minutos, remexendo sen parar. 
  11. Apagar o lume e incorporar o queixo de tetilla e a manteiga restante (50 g). Mesturar ata que se funda. Deixar repousar tapado durante 2 minutos. 

Para empratar, servir o risotto de polo con queixo de tetilla e cogomelos nun prato e botarlle por riba algunhas noces picadas.