Sopa de Nadal con caracois de pasta reenchidos de polo

Ingredientes para 4 persoas

2 zancos de polo Bon Pollo
200 g de caracois de pasta
1 cebola
2 dentes de allo
1 allo porro
2 cenorias
2 patacas
1 nabo branco
1 charouvía
¼ col verde
1 rama de apio
Loureiro
Aceite de oliva
Sal
Pementa negra

A sopa éche un clásico de Nadal imprescindible. Aínda que ás veces tentemos ser moi orixinais e busquemos receitas extravagantes, non hai nada como servir un prato delicioso e fumegante para conquistarmos a todos os convidados.

Esta sopa de Nadal con caracois de pasta reenchidos de polo só emprega ingredientes naturais para conseguir un resultado cheo de sabor. O segredo está en dourar as verduras en aceite de oliva e deixar que todos os ingredientes se cociñen a lume lento durante tres horas. Deste xeito vaiche quedar un caldo intenso e exquisito.

Para a presentación, recomendámosche empregar uns caracois de pasta de gran tamaño para que che sexan máis doados de reencher e che luzan máis no prato.

Váiseche facer auga na boca!

Elaboración

  1. Pelar e partir as verduras en dados medianos (mirepoix). Reservar. 
  2. Pelar e escachar as patacas. Reservar. 
  3. Quentar un chisco de aceite nunha ola e rustrir a cebola, os allos e o allo porro a lume medio. Salpementar. 
  4. Engadir as verduras restantes e refogar durante un par de minutos. 
  5. Engadir os zancos de polo, 4 litros de auga quente e unhas follas de loureiro. Mesturar e deixar cociñar durante 3 horas a lume medio, e ir tirándolle a espuma. Salgar e coar. 
  6. Partir as verduras do caldo en dados pequenos. Reservar. 
  7. Esfiañar os zancos de polo. Reservar. 
  8. Ferver os caracois de pasta nun cazo co caldo de polo anterior durante 15-20 minutos a lume medio. 
  9. Escoar os caracois de pasta e reencher coas verduras e o polo esfiañado. 
  10. Para empratar, servir a sopa de Nadal nun prato fondo e servir os caracois reenchidos de polo no centro.