Trenza de polo e brócoli

Buscas novas maneiras de gozar dos nosos produtos? Esta trenza de polo e brócoli, ademais de deliciosa, éche moi vistosa e doada de preparar.

Para o recheo, corta e sofrite unha cebola e un dente de allo. Agrega os escalopes de polo cortados en tiras e o brócoli relado. Para conseguires aínda máis sabor, podes engadir noces picadas, os cogomelos que máis che gusten e uns anacos de queixo de tetilla.

Facer o trenzado é moi doado: pinta o centro da masa de follado cun chisco de salsa pesto, engádelle o recheo no centro e corta a masa sobrante en tiras. Entrelázaas para conseguir un resultado elegante e sofisticado.

Vas conquistar a todos os comensais co seu aspecto e sabor!

Elaboración

1. Cortar os escalopes de polo en tiras medianas. Reservar.
2. Pelar e picar a cebola e o allo (sen o xermolo) en dados pequenos (brunoise). Reservar.
3. Partir os cogomelos e as noces. Reservar.
4. Relar o brócoli. Reservar.
5. Picar o queixo de tetilla en dados medianos. Reservar.
6. Quentar un chisco de aceite nunha tixola e rustrir a cebola co allo a lume medio.
7. Incorporar as tiras de polo e refogar durante 5 minutos. Salpementar.
8. Engadir o brócoli, os cogomelos, as noces e un chisco de ourego. Mesturar ben e cocer durante 5 minutos. Deixar a arrefriar, escoar ben e reservar.
9. Prequentar o forno a 190 °C.
10. Estirar sobre unha táboa a lámina de follado e pintar o centro da masa con salsa pesto.
11. Incorporar o rustrido de polo anterior e o queixo de tetilla.
12. Realizar cortes paralelos de arriba a abaixo en ambos os lados da masa.
13. Intercalar os cortes dun lado e do outro, de xeito que se cerre a elaboración en forma de trenza.
14. Pintar a trenza con ovo batido e botar por riba un chisco de sementes de papoula.
15. Meter ao forno durante 25-30 minutos a 190 °C.
16. Para empratar, servir a trenza de polo e brócoli nunha táboa e partir en racións. Servir como aperitivo quente ou frío.