Zancos de polo adobados con salsa cremosa de espinacas

Se es fan das espinacas, esta receita é a tal para ti. Se non o es, atrévete a prepara estes zancos de polo con salsa de espinacas; seguro que te van convencer. Os dous ingredientes principais vante axudar a manter o corpo e a mente activos.

O polo dános unha gran cantidade de proteínas, lípidos, vitamina B3 e minerais como calcio, ferro e potasio. Trátase dun alimento de fácil dixestión, e se lle quitamos a pel antes de comelo, reducimos notablemente o consumo de graxa.

O outro ingrediente estrela da receita son as espinacas. Ademais de lle dar unha textura cremosa ao prato, vaste beneficiar da gran cantidade de vitaminas que conteñen. Unha delas é a vitamina K, moi difícil de atopar nos vexetais e, ao mesmo tempo, moi importante para a saúde dos ósos.

Un consello: cando o polo estea á metade da cocción no forno, vaille dando voltas e verténdolle o zume da cocción por riba dos zancos. Así conseguirás que a carne quede ben tenra.

Elaboración

1. Pelar os dentes de allo e quitarlles o xermolo. Reservar. 
2. Espremer e relar a pel do limón. Reservar.
3. Triturar cun procesador de alimentos os dous allos con 60 ml de aceite, a reladura de limón, unhas ramiñas de tomiño e perexil, un chisco de ourego, sal e pementa.
4. Enchoupar os cuartos traseiros coa mestura resultante e deixar a adobar na neveira durante 1 hora e media.
5. Prequentar o forno a 190 °C. 
6. Meter ao forno nunha bandexa de forno os cuartos traseiros co seu adobo, 60 ml de viño, 60 ml de caldo e un chorriño de limón durante 1 hora e 15 minutos a 190 °C.
7. Á metade da cocción, darlle a volta e ir vertendo o zume da cocción por riba da carne. Reservar en quente. 
8. Pelar e picar as cebolas e dous dentes de allo en dados pequenos (brunoise). Reservar. 
9. Picar as améndoas cun coitelo. Reservar.
10. Quentar un chisco de aceite nunha tixola e rustrir as cebolas cos allos a lume medio. Salpementar.
11. Desglasar co viño branco restante e subir o lume para que se evapore o alcohol.
12. Incorporar as espinacas e as améndoas. Salpementar e refogar durante 5 minutos a lume medio.
13. Engadir a nata e o caldo. Cocer todo xunto durante 3-4 minutos. Reservar.
14. Triturar cun procesador de alimentos a elaboración anterior xunto co queixo parmesano ata obter unha salsa cremosa.
15. Para empratar, debuxar un círculo coa salsa de espinacas nun prato e pousar enriba un cuarto traseiro de polo adobado. Botarlle un chisco de améndoas picadas por riba e servir.

Gustouche esta receita? Bótalle un ollo ao noso polo con parmentier de cabaza. Vaite encantar pola súa cremosidade!