Zanquiños de polo con cava, ameixas e améndoas

Esta receita é perfecta para darnos unha homenaxe: zanquiños de polo con cava, ameixas e améndoas.

Pouco máis podemos engadir cando un prato fala por si mesmo. Meloso, intenso e saboroso, é un prato ideal para celebrarmos unha ocasión especial, pero tamén funciona de marabilla para o día a día. Se o preparas, esperamos que goces del tanto coma nós.

Elaboración

1. Pelar e picar as cebolas e dous dentes de allo (sen o xerme) en dados pequenos (brunoise). Reservar. 
2. Picar as améndoas en anacos medianos cun coitelo. Reservar. 
3. Escaldar as ervellas nunha ola con auga a ferver con sal durante 1 minuto. Arrefriar con auga e xeo, escoar e reservar. 
4. Quentar un chisco de aceite de oliva nunha tixola e cocer os zanquiños de polo con dous allos esmagados e as follas de loureiro a lume medio. Salpementar e reservar. 
5. Nun cunco, bater a xema de ovo coa nata. Mesturar e reservar na neveira.  
6. Fundir a manteiga nunha tixola e rustrir as cebolas cos allos en anacos pequenos (brunoise) a lume medio. Salpementar. 
7. Engadir as améndoas e refogar durante un par de minutos. 
8. Desglasar co cava e levar a ebulición. Deixar a reducir durante 5 minutos e incorporarlle a mestura de xema de ovo e nata anterior. Cocer durante 2 minutos a lume medio sen deixar de remexer co batedor. 
9. Incorporar os zanquiños, as ameixas e as ervellas. Cocer todo xunto durante 5 minutos tapado co testo e a lume medio-baixo. Salpementar ao gusto. 
10. Para empratar, botar unha base de salsa de cava no prato e colocar os zanquiños de polo. Decorar coas ameixas e as ervellas, e botarlle por riba un chisco de ceboliño picado.

Se buscas ideas de receitas para ocasións especiais, tamén recomendamos estes xamóns de galiña con gambas e ameixas. ¡Inigualable!