Boletos, shiitake, níscaros, champiñóns, portobellos, pantorras, cantarelas, choupíns… Hai moitos tipos de fungos, e podes elixir os teus favoritos para preparares a receita de hoxe: zanquiños de polo con cogomelos.
Doura os zanquiños ata que a pel colla cor. Retíraos e, na mesma cazola, engade a base para o mollo: a cebola, os allos, o viño, o tomate relado e as especias. A seguir, incorpora os cogomelos que máis che gusten e un puñado de piñóns. Cubre co caldo de polo para que acabe de cociñarse e xa tes o prato listo para servir.
Á hora de empratar, crea unha base cos cogomelos e engádelle dous zanquiños por persoa. Decora con perexil picado e asegúrate de acompañar o guiso con abundante pan para mollar na salsa . Bo proveito!
Elaboración
- Pelar e picar as cebolas e os dentes de allo en dados pequenos (brunoise). Reservar.
- Partir os cogomelos en anacos. Reservar.
- Relar o tomate. Reservar.
- Quentar un chisco de aceite nunha cazola e dourar os zanquiños de polo a lume medio.
Reservar. - Na mesma cazola, rustrir as cebolas e os allos a lume medio. Salpementar.
- Engadir o viño Pedro Ximénez e subir o lume para que se evapore o alcohol.
- Incorporar o tomate relado, un chisco de noz moscada, pemento doce en po e o bouquet. Cocer durante 5 minutos a lume medio.
- Engadir os cogomelos e os piñóns. Refogar durante uns minutos.
- Engadir os zanquiños de polo e o caldo. Cocer durante 30-35 minutos a lume medio-baixo e tapado co testo. Salpementar.
- Para empratar, servir os zanquiños de polo con cogomelos nun prato e botarlle un pouco de perexil picado por riba.