Zanquiños de polo con lagostinos e ameixas

Zanquiños de polo con lagostinos e ameixas

Ingredientes para 4 persoas

2 bandexas de zanquiños de polo de Bon Pollo
530 g de lagostinos frescos
230 g de ameixas galegas en conserva
1 dente de allo
2 cebolas brancas
1 pemento vermello
1 g de pemento doce
50 ml de ron
50 ml de viño branco
1 l de auga mineral
4 ramas de tomiño fresco
4 follas de loureiro
Ceboliño fresco
Aceite de oliva
Sal
Pementa negra

Zanquiños de polo con lagostinos e ameixas

Monte ou mar? Coa receita de hoxe non terás que escoller, xa que combina ambos mundos: zanquiños de polo con lagostinos. Trátase dunha receita tradicional da gastronomía catalá que logra harmonizar o mellor da carne e do marisco. Ademais, en Bon Pollo culminamos o prato co irresistible sabor das ameixas. Prepárate para mollar co pan. 

Elaboración

  1. Pelar e cortar as cebolas e o dente de allo (sen o xermolo) en dados pequenos (brunoise). Reservar.
  2. Lavar e cortar en dados pequenos (brunoise) o pemento vermello (quitándolle as sementes e as partes brancas). Reservar.
  3. Pelar os lagostinos e reservar, por unha banda, a carne, e, pola outra, as carcasas coas cabezas. 
  4. Quentar un chisco de aceite de oliva nunha ola e dourar unha cebola.
  5. Engadir as carcasas e as cabezas dos lagostinos, dúas follas de loureiro e o pemento doce. Refogar a lume forte durante uns minutos mentres se remexe.
  6. Desglasar con ron e cociñar ata que se evapore o alcohol. Salpementar.
  7. Engadir a auga e cocer a lume medio-baixo durante 30 minutos coa tapa posta.
  8. Coar o caldo dos lagostinos cun coadoiro fino, apertando para sacarlles todo o líquido posible. Reservar o caldo.
  9. Quentar nunha tixola un pouco de aceite de oliva e dourar os zanquiños de polo coas ramas de tomiño. Salpementar e reservar.
  10. Na mesma tixola, dourar a cebola cun chisco de aceite. Cando comece a estar transparente, engadir o dente de allo e refogar. Salpementar.
  11. Incorporar o pemento vermello e dúas follas de loureiro. Cocer a lume medio ata que estea feito.
  12. Desglasar con viño branco. Deixar reducir o alcohol un par de minutos a lume forte.
  13. Agregar o caldo dos lagostinos e deixar reducir un par de minutos a lume medio.
  14. Engadir as ameixas e os zanquiños de polo. Cocer a lume medio-forte durante 5 minutos. Rectificar o sal e a pementa negra ao gusto. 
  15. Incorporar os lagostinos e cocer 2 minutos máis a lume medio. Reservar.
  16. Servir os zanquiños de polo con lagostinos e ameixas. Decorar o prato con ceboliño fresco picado.

Se che gustou esta receita, seguro que te sorprenderá o tartar de polo con algas.