Zanquiños de polo con pera e figos

Coa chegada do frío apetecen os guisos coma o que che propomos hoxe: zanquiños de polo con pera e figos.

As peras e os figos danlle unha dozura moi especial a esta exquisita receita. Incorpora unhas poucas especias, un chisco de xenxibre e unhas follas de loureiro, e deixa que os zanquiños se cociñen a lume lento. A cociña váiseche encher dun aroma incrible… e xa verás cando lle deas o primeiro bocado!

Elaboración

1. Pelar e cortar a cebola en dados moi pequenos (brunoise). Reservar.
2. Pelar e relar o xenxibre. Reservar.
3. Pelar e picar as peras en cuarteiróns. Reservar.
4. Pelar e picar os figos en cuartos. Reservar.
5. Pelar as sementes de cardamomo da vaíña. Reservar os grans.
6. Torrar as sementes de cardamomo, coandro, comiño e pementa nunha tixola (sen aceite) a lume medio durante 2-3 minutos.
7. Moer as sementes torradas ata obter un po. Reservar.
8. Quentar un chisco de aceite de oliva nunha tixola e dourar os zanquiños de polo xunto cos dentes de allo esmagados e as follas de loureiro. Salpementar por ambos os lados e reservar.
9. Rustrir a cebola nunha tixola cun chisco de aceite.
10. Engadir as améndoas e torralas durante un par de minutos.
11. Incorporar o xenxibre, os figos, o po das especias, a canela, o anís estrelado e o sal (5 g). Cocer durante un par de minutos a lume medio.
12. Engadir as peras, o vinagre, a auga e o viño. Levar a ebulición, baixar o lume e cocer a lume lento e tapado durante 15 minutos. Remexer de cando en vez.
13. Incorporar os zanquiños de polo na salsa e cocer todo xunto tapado durante 15 minutos.
14. Para servir, botar un pouco de salsa na base do prato, colocar os zanquiños de polo por riba e decorar con anacos de pera e figo.

Se che gustou este guiso, non podes perder o guiso de polo con abelás e tomiño.