Zanquiños de polo con sandía e queixo feta

Ingredientes para 4 persoas

2 bandexas de zanquiños de Bon Pollo
½ sandía
1 dente de allo
120 g de queixo feta
1 laranxa
75 ml de salsa de soia
2 l de auga mineral
100 g de sal fino
60 g de mel de flores
30 ml de viño branco
3 g de sementes de mostaza
3 g de sementes de coandro
Perexil fresco
Sésamo negro
Aceite de oliva
Sal
Pementa negra

Como nos gusta experimentar coa froita no verán! Na receita de hoxe, traémosche uns deliciosos zanquiños de polo con sandía e queixo feta. Curioso, a que si? 😋

A elaboración que che presentamos vén cargada de sorpresas. Os zanquiños macerados e cociñados ao forno quedan moi saborosos e a sandía á prancha dálle un sabor delicioso. Ademais, como vai acompañada de feta, equilíbranse á perfección o doce da froita co salgado do queixo. Non esperes máis e proba a cociñalos. Non quedarás indiferente! 🤤

Elaboración

  1. Pelar e cortar o dente de allo en dados pequenos (brunoise). Reservar.
  2. Cortar a pel retirando a parte branca e espremer o zume da laranxa. Reservar por separado.
  3. Mesturar nunha ola grande a auga co sal, o mel, o viño, o allo, a reladura e o zume da laranxa, as sementes de mostaza e coandro, e unhas ramas de perexil. Remexer e ferver durante 2 minutos a lume medio. Deixar a arrefriar.
  4. Engadir os zanquiños de polo, mesturar e reservar na neveira durante 4 horas. É importante que o polo quede completamente cuberto.
  5. Prequentar o forno a 180 °C.
  6. Colocar o polo nunha bandexa de forno, engadindo un chorriño de aceite e un pouco do líquido da maceración.
  7. Cociñar no forno durante aproximadamente 1 hora. Ir vertendo o mollo da bandexa por riba do polo durante o cociñado. Reservar.
  8. Pelar e cortar a sandía en triángulos dun dedo de grosor. Retirar as sementes e reservar. Esmigallar o queixo feta. Reservar.
  9. Quentar un pouco aceite nunha tixola e marcar os triángulos de sandía durante un par de minutos a lume medio.
  10. Incorporar a salsa de soia, darlles a volta aos triángulos, engadir o queixo feta esmigallado e cocer durante un par de minutos máis.
  11. Para empratar, servir os zanquiños de polo e acompañar cuns triángulos de sandía e o queixo feta. Empoar cun chisco de sésamo negro por riba.

Se queres coñecer máis receitas de polo con froita, recomendámosche este polo recheo de noces e mazá. Con tal combinación, asegurarás o éxito.